قصة حكايتى مع الزمن 2024.

قصة حكايتي مع الزمن
الجزء الأول

نظرها مركز على الشاشة وبأيدها عم تحرك الماوس وبتدور بين المواقع والمنتديات لتشوف شو في شي جديد يلفت انتباها
رنيم: بنت في أواخر العشرينات مقعدة بسبب حادث، هادية، ناعمة، جمالها عادي، روحها حلوة ( زي ما بعرفها الكل)
رنيم اكبر إخوتها إلها أخت وحدة اسمها رنا اصغر منها بست سنوات متزوجة وعندها بنوتين والها اخين غسان عمره 26 سنة ومتزوج وعنده ولد وعدنان آخر العنقود 19 سنة حليوة والبنات بحبوه شب طايش متل اغلب الشباب في هيك عمر
نرجع لرنيم وتجوالها في النت… وهي عم تطالع بعض المواضيع لفت انتباهها موضوع عن الزواج في عصر الانترنت وبدأت تقرأ فيه واندمجت… سرحت رنيم في خيالها ورجعتها سنين لورا……………..
…:يا رنيم الشب كويس وما بعيبه شي من عيلة وابن ناس وبحبك وبدو اياكي وشاريكي .
رنيم:يا ماما مابدي إياه والله مو مرتاحة اله وبعدين هو من بيئة مختلفة عن بيئتنا وعاداتهم غير عنا ما راح اقدر اتفاهم معه .
أمها:كيف يعني ما بدك إياه وشو هالحكي الفاضي اللي بتحكي فيه ما هيني من بلد وابوكي من بلد وعشنا مع بعض لحتى ما ربنا اخد امانته… اتركيلي حكي المسلسلات والافلام تبعك واصحي على عمرك ولك أنتي مو شايفة أختك اللي اصغر منك انخطبت وهيّ اخوكي بدو يخطب وأنتي قاعدة بوجهي ترفضي هاد وتتعززي على هاد؟! لتكوني مفكرة راح يجيكي ابن بارم ذيلوه ولا الفارس على حصانه الأبيض… اصحي وشوفي الدنيا اللي من عمرك صار عندهم أولاد
رنيم:يا ماما يا حبيبتي وأنا شو ذنبي ؟ لسه ربنا ما كتبلي نصيب.
أمها:اسمعي هي كلمة ومافي غيرها إذا ما وافقتي أختك ما راح نتمم إلها شي.
رنا:نعم نعم بالله شو ؟ أنا شو دخلني فيها؟؟؟؟

أمها:رنا اسكتي وما الك دخل
رنا:بس يا ماما…. ( بتقاطعها رنيم)
رنيم:ماما رنا ما إلها دخل وهاد الحكي ما بجوز بكرة زي ما ربنا يسر إلها زواجها بيسر لي أنا كمان إنسان كويس
رنا( تحضن أختها ):ينصر دينك يا أحلى رنيم هاد الحكي الصح ( وبوسة مصلحة)
أمها:أنا قلت كلمة وحدة بدك تقبلي فيه وما عندي غير هالحكي أنتي لو ابوكي عايش ما حملت همك أبدا لكن بما انه ترككم أنتي وإخوانك وهالمقصوفة (رنا) فانتو أمانة برقبتي وبدي اطمن عليكم قبل ما يصير فيني شي…
رنيم:بعيد الشر عنك يا أمي وربي يطولي بعمرك وتشوفي أولاد أولادنا ( مع بوسة وحضن بحنية)
أمها: رنيم يا حبيبتي الله يرضى عليكي ريحي قلبي ووافقي على هالشب بكرة بتشوفي انه نظرتي في محلها والشب كويس ومافي منه
رنيم: والله ياماما صليت استخارة وما ارتحت … يعني أنتي مفكرتيني عاجبني تنقير الحكي على الطالعة والنازلة من كل اللي حواليي ليه لهلا ما انخطبت ….
أمها: ما هو أنتي اللي بتجيبي الحكي لحالك كل ما يجيكي واحد بترفضي وياريت بترفضي على شي محرز إلا ما عندك إلا ما عجبني اسلوبه في الكلام بدل انه مغرور وشايف حاله بمصاريه … ما عجبني هاد إنسان سطحي وما بفكر إلا بامور تافهة… ما عجبني هاد بخيل وكمان بتشرط وبتامر من قبل ما يصير بينا شي أنتي شو بدك فيه مغرور ولا سطحي ولا بخيل ولا بتامر ولا بتشرط بكرة بتغيريه على كيفك…
رنيم: يا ماما يا حبيبتي كيف شو بدي فيه هاي صفات ما بقدر اتقبلها في اللي بدي اخده كيف يعني اخد واحد مغرور ويضل شايفلي حاله انه أحسن واحد في الدنيا كيف بدي أعيش معه وهو بطلع على الناس من فوق وأنتي اسمعتيه وهو ما حكى عن شي غير مصاري البابا وفلوس البابا وشركات البابا والتاني إنسان سطحي ما بقدر اتناقش معه بموضوع جد إلا احكي معه عن انواع السيارات ولا عن آخر موديلات الموبايلات أنتي ما شفتي كيف من أول ما قعد وهو ما حكى إلا عن انواع الموبايلات اللي حملها واديش قعد معه كل موبايل ولا التالت اللي من أول ما دخلت عليهم الصالون وقعدت وهو يحكي اسمعي يا بنت الناس طلعة من البيت ما في… كل يوم والتاني تحكيلي بدي لبسة ولا فستان ولا كندرة ( اجلكم الله ) خليكي في بيت ابوكي … ولا تيجي تحكيلي اروح عند أمي ولا اروح عند اختي ولا في عرس فلان وعلان هاد الحكي ما عندي ….لا بدي ازور حد ولا حد يزورني واللي بزورني ما يفكر إذا اجى وبايده شي راح اردله الزيارة والهدية ….
أمها : خلص خلص انسي هدولاك خلينا في العريس الجديد هاد ما في شي فيه من اللي حكيتيه بس مشكلته انه على قد حاله ولا لتكوني بترفضيه عشان هيك وليه؟؟؟
رنيم: لا يا أمي يا حبيبتي عمر الزلمة ما بعيبه فقره ولا غناه كل القصة انه مو مرتاااااااااااااااااااااااااااااااااااااااااحة…
أمها: ولك قربتي تعنسي خلص أنا رديت عليه واعطيته الموافقة المبدئية ويوم الخميس جاي هو وامه وخواته
وبتركض رنيم لغرفتها خوف من أنها تبكي قدام أمها واختها ويشوفو دموعها….
بتصحى رنيم من سرحانها على رنة مسج جديد في الماسنجر (( صباحو يا عسل))
فبتبسم رنيم وبترجع للواقع وبتبدأ بالمحادثة مع صاحبتها سهام اللي تعرفت عليها في منتدى أبو محجوب…….

*** الجزء الثاني ***

اتداخلت افكارها كالعادة مع موضوع جديد في النت عن الزواج التقليدي والزواج عن حب ورجعت للسرحان من جديد….
….: رنومتي حبيبتي اليوم الزلمة جاي هو امه وخواته ليش لهلا قاعدة وما لبستي؟؟؟
رنيم : ماما أنا قلتلك مابدي إياه ليه أنتي مصممة تجبرني عليه
أمها: يووووووووووه على عقلك الزنخ يا رنيم قلتلك الزلمة منيح وأنا شايفة انه بناسبك خلص لا تضلي تحكي في نفس الموضوع وفزي قومي البسي شي مرتب خليهم يشوفوكي حلوة
رنيم : ليه هو باللبس بس ببين حلوة هههههههه ضحكتيني والله يا أمي … هلا بلبس الطقم الاسود وبمشي الحال
أمها: شو اسود أنتي التانية البسي شي فرايحي هم جايين يعزوكي ولا يخطبوكي
فتحت أم غسان خزانة رنيم وبدأت تفتش فيها شو تلبس هالمسخمة رنيم … ورنيم بتنط جنبها لا مابدي هاد مو حلو وهاد مو مرتب …
المهم استقروا اخيرا بعد جهد جهيد من رنيم لاقناع أمها بلبسها على فستان سماوي ناعم بدون حركات مع حجاب ابيض فيه نقشات سماوي… ولا مين جاي يركض من بعيد يا حزركم؟؟؟؟
المقصوفة رنا طبعا ….
رنا ( بتسحب نفس بسرعة): ماما ماما ماما
أمها: ولك شو مالك؟
رنا: اجو اجو …
أمها: مين اجى يا مقصوفة … ولك بدكيش تركزي أنتي بدك تضلك هيك شعنونة لايمتا صرتي عروس استحي على حالك.
رنا: العريس وصل هو وامه وخواته
أمها: يييييييي لسه بكير أنتي التانية بلا هبل
رنا: والله اجو شفتهم من الشباك ( وبتغمز رنيم اللي بوزها شبرين وبتدزها بخصرتها) حتى لابس اللي على الحبل ومتحمم هههههه
أمها: اللهم طولك يا روح ولك اتركي أختك في حالها خليها تلبس وتجهز حالها
وطلعت أم غسان بتحكي مع حالها شو هالناس اللي جاية قبل موعدها بساعة معقول في ناس هيك وضربت كف بكف
رنا: اه رنومة شو قررتي تلبسي يلا عشان اساعدك
رنيم: رنا الله يسعدك اتركيني بحالي اللي فيني مكفيني
رنا: حبيبتييييي رورو لا تدايقي خلص إذا ما عجبك بس اغمزيلي من بعيد وبشغل جناني عليهم
ضحكت رنيم على هبل أختها وحضنتها بالحنية اللي تعودت عليها مع اخوانها وكأنها امهم التانية
رنا حست أنها راح تبكي عشان أختها الحنونة متدايقة ومكسور خاطرها فبعدت عنها وقالتلها: صحيح سمعتي آخر نكتة ؟
رنيم ابتسمت : هاتي لنشوف
رنا:شوفي يا ستي هاد بقولك في مرة واحد محشش متردد يقطع الشارع راح قطعه فدعسته سيارة فقال: وشرفي كنت عارف
رنيم مسكت المخدة ورمتها على رنا اللي هربت بسرعة برى الغرفة
ضحكت رنيم على أختها وبدأت تلبس بهدوء
رن جرس الباب وام غسان في المطبخ بتحضر الضيافة فركضت رنا على الباب لتفتح للضيوف
كان بوجهها أم خالد ولما شافت رنا نزلت فيها تبويس : ما شاء الله عليكي يا خالتي الله يحرسك الله يحفظك
رنا ( وهي بتحاول تفك حالها من ايدين اكلة لحوم البنات ): الله يخليكي خالتو … تسلمي خالتو
أم خالد: كيفك يا عروستنا أن شاء الله مبسوطة
رنا : شوووووووو لا خالتو أنا أختها الصغيرة … وهربت المقصوفة لعند أمها ونسيت العالم اللي واقفة على الباب
أم غسان : ولك وبعدين معك ليش بتركضي هلا
رنا : شوفي يا حكم
أم غسان : حكم بعينك استحي ولك أنا امك …. أنا هيك ربيتك
رنا: خلص تزعليش يا ستي هدول أهل العريس وصلو وفكروني العروس
أمها: بالله والك ساعة بتتخوتي ما تحكي من أول ( مع ضربة خفيفة على الراس) تاركينهم قاعدين لحالهم في الصالون واحنا بنحكي هون
رنا: ييييييي انسيتهم على الباب واقفين
أمها : الله لا يعطيكي العافية ولك أنتي ايمتا بدك تكبري
وطلعت الحجة أم غسان تركض لتحاول تصلح الوضع أما رنا فراحت لعند أختها تتخوت عليها شوي
رنا : دق دق دق
رنيم: بلا برادة وليه الباب فاتح

يا جماعة هى مش القصة كاملة لسه بااااااااااااقى كتير اجزاء ده بس الجزء الاول والثانى
وباى الاجزاء رح احطها بعدين عشان التشويق والمتابعةالبرونزيةالبرونزيةالبرونزية

مشكووووووووووورة أختي عالرواية واكملي مابدأتيه

يلاه حبيبتي بننتظر البقية ولاتطولي علينا وبدايتها حلوه ومشوقة
بالتوفيق حبيبتي

مشكوووووووووووره اختي

يسلموووو

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.