السلام عليكم ورحمة الله وبركاته
حبيت الموضوع ما يكون مجرد بس ايش الـTrends او الموضة حبيت يكون في نصايح و هذرتي المعتادة
بتكلم عن الموضات وبتكلم عن اخطاء ممكن يتوهقون فيها العرايس بدون مآ يحسون
اذا انتي مخطوبة او بتتزوجين قريب هالمووضوع لك
واذا انتي Single بعد هالموضوع لك وبتعرفين ليش لما تقرينه
*ارجع واكرر انا هالنصايح من خبرتي الشخصية او من تجربتي بالحياة انا ماني خبيرة لكن هذي اشياء تعلمتها
من تجارب واخطاء صارت قدامي و ما احب اي عروس باحلى يوم بحياتها يصير لها كذا
اذا عندك نصيحة او شي حابة تعلقين عليه او حابة تخالفيني الراي بنقطة تفضلي علشان نساعد بعض~ ويفضل يكون في الكومنتات مو التقييم علشان الكل يستفيد
البشره
اول شي البشرة ثم البشرة ثم البشرة
بصراحه يزعلني ان بعض البنات للحين عندها عقلية تنتظر تنخطب علشان تهتم ببشرتها
المفروض انتي تسوين هالشي لنفسك مو لاحد يعني حتى لو انكم single يا بنات ابدو من هاللحظة تهتمون ببشرتكم
لا تضغطين نفسك باخر 8 اسابيع وتبدين ماسكات او علاج ازالة شعر سيقانك او مثلا تبدين تهتمين فجاة بعلاج مشاكل بشرتك بالاجمال ولما نقول بشرة نقصد الوجه + الجسم ككل
خذي وقتك المفروض اساسا 8 اسابيع قبل الزواج يعني شهرين قبل حفلة زواجك تكونين قاضية ومنتهية وخالصه من كل العلاجات و كل شي مجرد انك ترووقين وتنتظرين هالليلة الحلوة لان اولا بعض هالعلاجات لها تاثيرات جانبية او مثلا تحتاج نتايجها وقت اطول من المتوقع علشان تبان فاعليتها وخاصة للاشياء مثل ماسكات الوجه او العلاجات لبشرة الوجه ممكن تاخذ وقت اطوول بالعلاج لان بشرة الوجه حساسة جدا فاعطي نفسك فرصة دايما و لا تحطين نفسك بوقت ضيق مراا وتوهقين نفسك .. ابدي بدري حتى لو باقي على زواجك سنة او سنتين كثير بنات اعرفهم ينخطبون وتنتظر مثلا تتخرج من الجامعه علشان تتزوج فهالوقت هذا لا تجلسين يدك على خدك و تاجلين وتاجلين لبكرا بالعكس استغلي هالفرصة وضبطي نفسك واذا انتي اساسا من النوع اللي يهتم بحاله اول باول وما تحتاجين هالشي برافو عليك .. هذا الصح . ما يحتاج اشرح وش يتضمن هالعلاجات منها ازالة شعر الساقين والذراعين والخ… او تبييض او تصغير مسام البشرة او معالجة الحبوب او الاثار يعني حسب كل بنت وايش المشاكل اللي تواجهها ..اهم شي لاتفقدين الامل وكل شي له علاجه احب اضيف البنات اللي يسوون ريجيم هذي فرصتكم للرياضة و الرشاقة اشتركي بجيم و خلي جسمك رياضي شووي البشرة مو بس علاج خارجي وماسكات .. تتضمن يكون مشدود و مرتب طبعا زي ما قلت في بنات بدون شي هي خلقتها تحب تحافظ على نفسها لنفسها تلقينها مهتمة بجسمها وبشرتها بدون اي شي وبهالحالة your done لوول.
اكبر خطأ ممكن يسوونه العرايس .. اللي تسوي تاتو لحواجبها وشفايفها قبل الزواج
او مثلا تجرب خلطات شعبية بالبيت وتنتهي بكوارث اليمة على بشرتها !!
يعني حبكت عندك تجربين الحين ؟؟
اجلي هالسوالف بعد الحين خلك زي ما انتي بس اهتمي بنفسك بالطريقة الصح و اتركي
الخرابيط اللي نتايجها وخيمة بعدين والتجارب اجليها لوقت ثاني
الشعر
يقهروني اللي يقصون شعورهم او يصبغونها قبل الزواج بـ اسبوع او 4 ايام!!
يمكن تطلع الصبغه مو حلوة ؟ يمكن القصة تطلع قصيرة مرا او غير مناسبة؟؟
ما يمديك تصلحين الخطأ ولا يمديه يطول!
علشان كذا اقول دايما لازم قبل الزواج بـ شهرين يكون خلاص قررتي ستايل شعرك وخلاص في حال لا سمح الله صار شي ولا شي يمديك تصلحين الخطأ ويمديه يطول شوي
مع ان ما انصح العرايس يكون شعرهم اقصر من الكتف علشان يمديها تسوي حركة مع الطرحة
و dont try too hard انك تكونين عالموضة . خليك بشخصيتك ..كثير بنات لما يتزوجون فجاة تلقينها قلبت ستايلها 180 درجة التغيير دايما بالبداية ما نتقبله فعشان كذا لو تبين تسوين انقلاب بستايلك خليها قبله بشهرين او 3 علشان يتقبلون شكلك اللي حولك
وما تسمعين تعليقات يوم الزواج مثل "قبل كانت احلى" او "وش مسوية بنفسها"
وبعدين لما تسوين هالشي بيكون عندك وقت كافي بعد الصبغه او القصة الجديدة انك تسوين ماسكات لشعرك او علاجات ترجعله حيويته وتعرفين ان بعد الزواج بيبدون الاهل عزايمهم "عادات وتقاليد سعودية" وكل يوم بتسشورين وبتسوين تسريحة فاكيد يحتاج انك تهتمين فيه
سويله علاج او كيراتين او اهتمي عالاقل بالماسكات العادية اللي ممكن تلقينها بالصيدليات .
التسريحة~
ما انصح ابدا تبالغين .. اشوف عرايس يحطون ستراس و بكل وخرابيط وريش بشعرهم!
عيد ميلاد مو راس!
شينيون ناعم ممكن ولازم صراحة تسريحة وشوي متعوب عليه يعني البساطة الزايدة ممكن تتحول لاهمال وهالشي ما تبينه بزواجك لا مبالغه ولا بساطة بزيادة خير الامور اوسطهآ
وشكل وستايل و خامة الطرحه مراا مهم مع وجه البنت وطول شعرها والفستان وجسم العروسة
يعني البنت الممتلئة غير عن العصقولة و اللي شعرها قصير غير عن اللي شعرها طويل واللي مرفوع غير عن اللي شعرها نازل وهكذا لازم تهتمين وتجربين الى ان تلقين اللي يناسبك
اهم شي تكون التسريحة مرتبة و معقولة! يعني المبالغة مو حلوة
ولا البساطة بزيادة حلوة~ الموضة هي البساطة بالافكار..
المكياج دايما اقول وقلتها سابقا لازم يكون مناسب لملامحك وستايلك اشوف بنات طول عمرهم يحطون ميك اب روعه و كشخه بس مدري مين ينصحهم بيوم زواجها انصدم انها حاطة مكياج خليجي دفش!
يعني المناسبة تستدعي هالشي؟؟ لا طبعا .. بس بعض البنات ينجررفون ورا اي نصيحة
حطي مكياجك اللي يناسبك بس بطريقة بروفيشينال يعني لما تحطلك خبيرة التجميل تحط اللي يناسبك مو اللي هي تعرفه! طبعا ما يحتاج اقول ان لازم تسوين بروفه لمكياجك مثله مثل تسريحة شعرك
ومافي مانع انك تجربين اكثر من خبيرة تجميل او اكثر من كوفيرة للشعر الى ان تختارين اللي يناسبونك.
الاحظ بعض البنات يحطون روج احمر ومثلا البوكيه اللي بيدها يكون ورد اورنج او اصفر فاتح !
تحسين تناقض بالالوان! و تنتهي بلوك غير مرتب ابدا وغير متناسق!
يعني انتبهي للتفاصيل هذا اللي ابي اوصله..مو شرط تطقمين من راسك لرجولك بس حاولي يكونون متماشين مع بعض
وعامة اتركي اللوكات الصارخة او الدفشة بيوم الزواج والبساطة احلا
وبعد في نقطة مهمة .. لا تنسخين غيرك!
الاحظ كثير من البنات تشوف واحدة او ستايل عروس عاجبها وتروح تنسخ والنهاية تطلع شي مختلف لان معروف الاستنتساخ ما ينجح!
وخاصة اللي يقلدون المشاهير او غيرهم بدون ذكر اسماء .. الله خلقك ملامح غير عن ملامحها .دوري اللي يناسبك لا تنسخين والمشكلة الكل بيدري انك ناسخة
هالانسانة يعني وش بتستفيدين!
كل خبراء التجميل يقولوون لاتحطون Trendy makeup
ونفس النظرية تنطبق على تسريحة شعرك والفستان حاولي علشان ما تخلينها بوقت محدد
وبعد فترة تشوفين صورك جميلة وما تقولين "ايش هذا ؟"
لان الموضة تتغير وغير كذا البساطة والكلاسيك تعطي لوك انعم واحلى
خلي الموضة والفنكي والصرعات والخرابيط بحياتك الباقية بس هاليوم تنازلي شوي
اسمعو نصايح ليزا ف اليوتيوب لمكياج العروس+اخطاء تفاديها علشان ما يطلع شكلك غلط بالصور
كلامها درر يا بنات~
الفستان
الفستان المثالي هو اصعب مهمة للعروس .. اذا انتهت منها تنتهي نص مهمتها
الفستان هو بيحكم مكياجك و شعرك و طرحتك و كل شي..
قصة الفستان وخامته مهمة مثل الموديل، راعي عيوب جسمك وابرزي مزاياه
انا ما احب شخصيا فساتين الزواج الملونة واحسها بصراحة منقرضة
بس في بنات يحبون وبهالحالة ننصحك تتركين الالوان الصارخة طبعا
في الوان ناعمة وهادية
بعد راعي نقطة مهمة .. زواجك ومكانه ، بقاعه كبيرة ؟ باستراحة ؟ ببيتكم ؟
كل مكان وله حجمه اذا قاعه كبيرة وفي فندق ممكن تسوين فستان كبير و ذيل يسحب
و طرحتك تخلينها بالطول اللي تبينه
بس لو بيتكم او استراحة او مكان صغير عامة ..
حاولي تراعين ان ما تخلينه كبير مراا و تنسين فكرةالذيل او الطرحة الطويلة مراعاة للمكان
غير كذا
طول البنت وتكوين جسمها يحكم .. البنت القصيرة او الضئيلة لا تفكر ابدا
تاخذ فستان منفووش بزيادة علشان ما تطلع ضايعه فيه والخ..
اكيد كل بنت تعرف وش يناسبها لان تقريبا نفس قوانين فساتين السهرة العادية
تنطبق على فستان الزواج
علشان تاخذون فكرة عن اخر الموضات
نروووح لليوتيوب فيه كل شي جديد
لازم تسوين شنطة خاصة فيك لهاليوم مخصصة بس لاغراضك انتي مو اغراض خواتك ولا صديقاتك!
حطي فيها سيشوار – سيروم للشعر – سبراي – دبابيس شعر اضافية – رموش صناعية احتياط
قلم حواجب اضافي -براية – قلم ونوتة صغيرة عدسات اضافية اذا انتي تلبسين عدسات
مزيل ماكياج – مناكير – اسيتون – ابر وخيوط و دبابيس ملابس-فرشاة اسنان ومعجون
(يمكن تبين تاكلين شي قبل الزفة وتوهقتي تبين تفرشين اسنانك قبل التصوير )
اشياء خاصة ثانية يعني حسب كل بنت واحتياجاتها. طبعا خبيرة المكياج والشعر
بتجيب عدتها بس ممكن لا سمح الله مثلا يخترب شي او يضيع شي او تنسى شي!
ما يحتاج كل هالدراما بيوم الزواج .. فجيبي استعداداتك الاحتياطية معك
ولا تنسين الاهم .. كاميرتك الخاصة وشاحن جوالك. لازم توثقين هاليوم بالصور وانتي يحطونلك مكياج ويسوون شعرك وصورك عشوائية وهبال مع صاحباتك قبل الزفة وصور لك مع خواتك وانتي بالغرفة تستعدون مع بعض
هالصور تبقى احلى ذكرى وتشوفينها بعد سنوات وتضحكين .
ومبروك لكل العروسات والمخطوبات ان شاء الله تكونون استفدتو ولو شوي
منقوول للفائده
روعة
