الوسم: الغرابيل

البال ضاق وباد من حملي الحيل
هدت عزومي جايرات الليالي

شوفي جروحي بالحنايا مداهيل
وشوفي شقاي اليوم صاير ظلالي

اشرب همومي مثل شرب الفناجيل
الحزن كيفي والمواجع دلالي !

سنين تمضي كلها ويل في ويل
وشهو بقى ماشاف قلبي وبالي ؟

جداي دمعي والقلم والتماثيل
ضايق فؤادي والزمن ما صفالي

ارسم أماني العمر لاطرف الليل
وأصبح وحلمي مات قبل الزوالي !

وحظي تردا صايبن سيره الميل
انخاه ولكن ما يجيب الندا لي !!

الصدر ضاق وفاض من صبري الكيل
لا الهم زال ولا تحقق منالي

واصحابي اللي هملوني بها الويل
راحوا وانا موتي ينادي تعالي !

يوم انهدم قصري ولابه تساهيل
شرهة يميني تاصلك يا شمالي !!

من بعد ما كانت يميني مناديل
لدموعهم وافنيت حالي ومالي !!

وارسم لهم خط الامل بالتفاصيل
واشيل حملن ماتشيله جبالي !!

قفوا بلا اسباب من غير تعليل
لاصوت يسمع ولاجواب لسؤالي؟!

الله يعوض خاطري فالمقابيل
ويعوضني عن كل شي جرالي

يمه انا برجاك يا قبلة الجيل
مافيه غيرك من يحاتي لحالي