تخطى إلى المحتوى

أنا والأحذية

بسم الله الرحمن الرحيم
السلام عليكم ورحمة الله وبركاته

دايما تتكر عليا احلام الأحذية لكن كنت دايما احلم بفردة حذاء وحدة الفترة الأخيرة سرت احلم بالفردتين

آخر حلم حلمته وكان فردة حذاء وحدة :
كان فيه ستاند دائري دورين مليان أحذية بيضا وكانت حلوة وكان الستاند بيدور وأنا اخذت منو فردة حذاء بيضا حلوة مقفلة من الامام وليها كعب صغير جدا وانتهى الحلم من غير ما اخذ الفردة التانية.

بعدها حلمت بحذاء اهدتني اياه جدتي قبل 5 سنين تقريبا الحذاء لونه بيج مفتوح من الأمام وفيها ورود بيضا من عند الاصابع حلمت اني اخذت هذا الحذاء من الدولاب ولبسته لكن اتحول الى كعب قصير بيج مصنوع من الجلد وليه فتحة صغيرة من الامام وكنت فرحانة ومعجبة بالكعب وسرت اتمشى بيه واقول في نفسي خلاص هذا راح يسير الكعب الي دايما البسو مع انو شوية واسع عليا.

بعدها حلمت انو جاتني هدية جزمة رياضة لونها فسفوري وكنت فرحانة بيها جدا ولبستها ورحت اتمشى فيها في ممشى مشهور عندنا وكان الوقت بعد الفجر والجو ضباب مشيت شوية وكأن الجزمة كانت واسعة عليا شوية لكني كملت ليها وكانت مريحة بعدها لقيت صاحبتي المقربة اسمها بدور كانت تمشي قدامي وفيه شباب بيضايقوها حاولت اسرع عشان الحقها لكني ماقدرت كأن الجزمة ماكانت مساعدتني.

بعدها حلمت اني كنت في محل بودي شوب وكان معروض فيه حذائين ! واحد سليبر ابيض قطن والثاني كعب لونو بنفسجي وكعبو بيج جربت السليبر وعجبني جدا كان مريح وناعم وجربت الكعب وكمان عجبني وقلت في نفسي بعدين راح اشتري الكعب عشان ينفع للجامعة.

بعدها حلمت نفس المكان نفس المحل نفس الحذائين بس كان في وحدة تجرب السليبر القطن وكأنو كان نفسي فيه بعدين اتذكرت اني قررت اشتري الكعب عشان الجامعة فلبست الكعب عشان اجربو وسرت اجري فيه وفرحانة جدا لأنو مريح واشتريتو لكني شوية اتحسفت على سعرو كان ميتين ريال وبعدها طلعت امشي في الشارع وكان الشارع هذا الي امام بيتنا الي كنت ساكنة فيه قبل 7 سنين في نفس المدينة وبدأ الكعب يألمني من عند اصبعي الكبير في الفردة اليسار فرفعت رجلي عشان اشوفو لقيتو مقطوع وكأنو فيه مسمار طالع هوا الي يألمني فقلت خلاص راح ارجعو او ابدلو وانتهى الحلم لكني ما اتذكر اذا رجعتو او لا.

عمري 20 سنة ، غير متزوجة ، طالبة في ثالث سنة في الجامعة ، ملتزمة ولله الحمد.

اسفة جدا ع الاطالة وجزاكم الله خير.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.