الوسم: اللهم

انا متزوجه من 4 سنوات وكم شهر

وعندي ولد واحد الله يخليه لي ويصلحه اول حمل قبل ولدي اجهضت والسبب توقف نبض الجنين بعمر شهرين

واجهضت بالمستشفى نزل لوحده ومااحتجت تنظيف

وحملت بعد سنه بالظبط اكلت حبوب منع الحمل 8 شهور وسوتلي مناعه 4 شهور وحملت بعدها الحمدلله

وتم الحمل وجبت ولدي

وجلست 3 سنوات

وبعدها حملت لكن مااراد الله و اجهضته بعمر شهرين نزل مني دم وبعدها طاح بالبيت ورحت لمستوصف خاص بعدها وشيكت اذا فيه شي وقالت لي الدكتوره مافي بقايا
وسويت تحاليل علشان اعرف سبب الاجهاض بس كانت التحاليل سليمه

ثم جلست 4 شهور وحملت بشهر 10 هجري لكن ماتم اجهضت بعمر شهرين ونص وهذي الاجهاضه اللي ابقولكم تجربتي معاها الله لايوريها لاحد منكم ويتمم على كل حامل
فرحت بهالحمل لان قبلها اجهضت حتى زوجي وده اجيب بنوته وكنت مره خايفه قبل الحمل كنت اخذ حمض الفوليك بشهرين تقريبا والدكتوره هي اللي قالت لي عليه المهم كانت نفسيتي متوتره لابعد حد مدري وش فيني

تابعت الحمل طبعا بمستوصف خاص وصرفت لي اسبرين ومثبت وحمض الفوليك وفيتامين وزيت السمك

وسويت سونار لما خلصت الشهر الاول وكل شي تمام الكيس موجود والجنين موجود

وبهالفتره منعتني من كل شي حتى الجماع والسفر والله حافظت على نفسي وجلست شهر ماشفت احد
وحرمت نفسي من اكل المطاعم وخليت اكلي صحي وقالوا البقدونس والزنجبيل يسببون اجهاض وتركتهم
وحافظت على الرقيه والاذكار وقراءة سورة البقره

وعطتني موعد بعد شهر علشان النبض ورحت على الموعد ويافرحه ماتمت مافي نبض وقسما بالله خنقتني العبره لكن كل شي مقدر ومكتوب ولا اعتراض على الله

بس طمنتني انو عادي فيه ناس مايبين النبض معاها الحين وعطتني موعد بعد اسبوعين ورجعت للبيت ونفسيتي كلها دماااااار

ورجعت لها بعد اسبوعين وسويت سونار ومافي نبض وقالت لي خلاص اصلا حجم الجنين مازاد من اسبوعين يعني ميت

وطلبت منها اسوي تحليل هرمون علشان ابي اتاكد وطلعت النتيجه وقالت لي تحليل الهرمون مره نازل

يعني خلاص انتظري الين ينزل من نفسه بكل برررررود

رجعت للبيت ودموعي على خدي ويومين مااكلم احد وقفلت جوالي ونفسيتي زفت

وقلت خليني اروح لدكتوره ثانيه اتاكد ورحت واكدت لي نفس الي بس هي زودت خوفي وتوتري قالت لي احتمال انه يكون حمل عنقودي

انا خلاص احس مو قادره اتحمل الصدمه ورجعت للبيت وقعدت احاتي واسال عن الحمل العنقودي وطلع خطير الله يعافينا منه ان شاء الله

وطوالي على الطوارى للمستشى الحكومي اللي انا تابعه له واكدوا لي انو مافي نبض والجنين ميت وانو مو حمل عنقودي وقعدت اترجى الدكتور

انه يعلمني بالصدق وقال مو حمل عنقودي وولراني صورة الاشعه وفهمني انه مايكون كذا

المهم عطاني موعد بعد اسبوع عندهم واذا حصل نزيف قبل الموعد قالي تعالي للطوارى

وصرااااحه انا كنت خايفه اني اروح لمهم اذا جاني نزيف لان اختي وزوجة اخوي سووا لهم تنظيف بدون بنج

وسالت اكثر من مره هنا بهالقسم اذا تعرفون مستشفى خاص اسوي عندهم تنظيف اذا احتاج الامر

المهم النفسيه الى الان دمااااار وبديت اكل اعشاب علشان التسقيط ودي انه ينزل من حاله بس حالتي هالمره تختلف عن حالت التسقيط الاوله هالمره مافي دم ابدا واتوقع من المثبت

وبديت من يوم الاثنين اللي طاف وشربت اربع ايام عنزروت على الريق واكل رشاد مع تمر واكل ملعقة رشاد

قبل النوم وشربت قرفه وكثرت من التمر لانها يقولون انها تفتح الرحم

ومويه مقري فيها وهذا كله زولا نزل مني دم ابدا وصراااحه خفت

قلت لازم امشي ساعات طويله وطلعت للسوق يوم الاربعاء وكمان طلعت يوم الجمعه ولما رجعت من السوق نزل مني شوية دم وانبسطت مرررره وسويت لي مرق لحم وحطيت معاه عشبة المدينه حقت التسقيط واكلته

وطبعا استمريت على كل اللي ذكرته اول

يوم السبت زاد الدم معاي الحمدلله وبدا المغص يروح ويرجع بس على خفيف وكنت متطمنه من كل النواحي انو مجربه التسقيط وعادي مايخوف مررره

المهم اول ماصحيت شربت منقوع العنزروت وافطرت بعدين سويت لي قهوه وحطيت معاها نونخه وزنجبيل وتقهويت واكلت تمر برشاد
ولما جاء وقت الغداء سويت مرقه وحطيت معاه عشبة المدينه وشربتها

وبعد الغداء سويت لي شاي قرفه

جاء المغرب الا زاد معاي الوجع وزاد المغص كان كل 10 دقايق رحت وحطيت بالفوطه وانتم بكرامه شوية حلتيت مذوبه مع ماء وشميت شويه منها

قسما بالله ماقعدت 10 دقايق الا وزاد الوجع وكان نفس وجع الدوره لكن اشد وانا اول مره يحصل معاي كذا

وبعدين نزل مي دم واجد وكتل دم كثيره

وزاد الوجع كني قاعده اولد مثل الطلق

واحس بشي بينزل واروح للحمام بسرعه الا نزل مني قطعه دم مثل الكبد بحجم الكف وخفت :0107:وقلت اكيد الحين بينزل الجنين بعدها لاني اعرف شكل الجنين شفته بكل تسقيطاتي الاوله

ونزل بعدها مره ثانيه قطعة دم مثل الاوله ونفس حجمها والالم مستمر والدم زاد وتحول لنزيف وهنا الطامه انه صار فيني نزيف ولا نزل معاي الجنين وخفت اطول ومااروح للطوارى ويصير شي

وطبعا كل شوي نازله معاي قطعة الدم الكبيره والله يااخواتي اول مره بحياتي يصير معاي كذا

وياحياتي اختي عندي وخايفه على وكانت تقولي امشي للطوارى وانا لرافضه لاني كنت خايفه من عملية التظيف

بس لما شفت النزيف زاد على طول توكلت على الله ورحت ودخلوني على طول لانهم شافوني انزف

دخلت الغرفه واول ماجلست على السرير كب معاي دم واجد وقطع دم مثل الاوله الكبيره وكنت ابكي :074:من الخوف
ومن الوجع والله كني اولد مو اسقط

على طول ركبوا فيني المغذي لاني نزفت واجد وسووا لي السونار بيشوفون الجنين نزل ولا لا وطلع موجود

وزاد خوفي بس الحمدلله سووا لي كحت بسيط بيدينهم ولقوا الجنين عند عنق الرحم يبي ينزل ونظفوني من البقايا

ورااااح الوجع بعد مانزلوا الجنين سبحان الله

وحسيت اني دايخه وتعباااانه بالمرررره :د0:

وتاكدوا الين نزل كل شي واستقرت حالتي وطلبت من الدكتور انه يعطيني موعد مع استشاري الاجهاض علشان يتابع حالتي وقال خلاص وموعدي بعد شهر
وصح خذوا الجنين على شان يحللونه بيشوفون سبب الاجهاض وان شاء الله يكون خير يااارب

والحمدلله على كل حال انا الان الحمدلله بخير صح معاي بعض التقلصات والمغص بس الحمدلله احسن من الوجع الاول

ابسالكم يااخواتي من مرة بمثل حالتي بسالفة قطع الدم اللي مثل الكبد حوالي 8 حجمها كبير وش تكووون والله مقلقتني هالسالفه معقوله يكون دم فاسد قديم وتوه يطلع ؟؟؟
طيب وين كان متجمع ؟؟؟

وياليت تستفيدون من تجربتي ودعواتكن لي بالحمل التام السليم يااااارب

اللهم فرح قلبي وآنس وحشتي ونفس كربتي وفرج همي وعوض صبري وقر عيني ياودود ياودود ياذا العرش المجيد فعالا لماتريد أسالك بنور وجهك وبرحمتك التي وسعت كل شي اللهم اني اسالك ان تقضي حاجتي يامغيث اغثني يامغيث اغثني يامغيث اغثني

اللهم رضني بما قضيت لي وعافني فيما ابقيت حتى لا احب تعجيل مااخرت ولا تاخير ما عجلت

ربي ارزقني وارزق اخوتي بالذرية الصالحه المعافاة ربي لا تذرهم فردا وانت خير الوارثين رب هب لهم من الصالحين وبشرهم بغلام حليم رب ارزقنا جميعا وارزق المحرومين يارب العالمين