اخواتي العزيزات بعد ما قريت موضعي الاختين د.فيض النور والقناصه الورديه اتشجعت اكتب تجربتي انا كمان
انا الحمد لله ولدت توام بنتين ما شاء الله في اخر شهر فبراير في نهاية الشهر الثامن وكان وزنهم قليل جدا
بس الحمد لله من اول يوم بدات معاهم ط§ظ„ط±ط¶ط§ط¹ظ‡ الطبيعي ولكن الدكتور نصحني اني اعطيهم صناعي علشان يكبروا بسرعه وجسمهم يكون دهون علشان ميحصلهمش هبوط في نسبة السكر لانهم كما ذكرت وزنهم قليييل جدا
وكنت من قبل الولاده اقرا مواضيع لدكتوره شروق ما شاء الله عليها ربنا يكرمها والحمد لله اتعلمت منها كيفية المسك الصحيحه وكيف اساعد طفلي ان يرضع وكذلك ازاي اعرف انه بيبلع او لا المهم كنت احاول اتعلم كيف ارضع لاني بكريه ولوحدي في الغربه
المهم بدات الرضاعه والدكتور قاللي لازم يرضعوا كل ساعتين
وكان الموضوع مرهق جدا جدا لانهم صغيرين ومش عارفين يمصوا كويس والرضعه بتاخد وقت طويييل جدا مابالكم بالاتنين وخصوصا لما يبكوا مع بعض فكنت على ما اخلص الرضاعه الاقي الساعتين فاتوا وابتديت من جديد فبقيت بارضع 24 ساعه من ال24 ساعه
ومنهم واحده مش عارفه تلقم الصدر كويس وانا مرهقه وتعبانه من الولاده القيصريه
ومفيش نوم والحلمة مجروحه وتؤلمني جدا اثناء الرضاعه
جبت شفاط وكنت اعصر الحليب نهارا واحس البنات مش شبعانين بردو
و اعطي الصناعي بالليل عشان اعرف انام واسيب واحده منهم مع امي اثناء نومي وواحده بس تكون معايا وفضلت على الوضع ده شهر
وبعد الشهر ماما سافرت وسابتني
وبدات اواجه الموقف وحدي واصبحوا بيناموا معايا الاتنين وانا الفتره الاولى كنت معذبة الضمير جدا وحاسه لبني قليل
وامي دايما تقوللي مش بيشبعوا انتي مش بتاكلي كويس انتي مهمله
وفعلا كنت افقد وزني بصوره رهيبه نزلت حوالي 15 كيلو في اول اسبوعين
وطبعا الصديقات والجيران لازم كل واحد يقول رايه
مش هتقدري ترضعي الاتنين طبيعي لازم تدخلي الصناعي
وتختلف الاراء انتي رضعيهم من صدرك شهر ولا 2 وافطميهم من الطبيعي وكملي صناعي
وحد تاني يفتي ويقولك رضعي واحده طبيعي والتانيه صناعي طبعا كلام مش معقول ليه احرم واحده منهم من حقها
واللي تكلمني تقوللي انتي لسه بترضعهيم طبيعي كانهم خلاص بقوا سنتين وانا مفروض افطمهم مع انهم مكانوش كملوا الشهرين
المهم كل الكلام المحبط اللي في الدنيا مفيش اي تشجيع ولا احساس بالتحسن حتى امي كانت بتحسسني انهم مش شبعانين ومش بيرضعوا مني كويس (رغم اقتناعها بالرضاعه الطبيعيه) فاضطر اعطيهم الصناعي خوفا من اني اسيبهم جعانين
وحتى اطباء الاطفال نصحوني اعطي رضعه طبيعي ورضعه صناعي
كل ده خلاني افقد الثقة في نفسي تقريبا رغم حماسي الشديد قبل الولاده للرضاعه الطبيعيه
لحد ما كنت مره باتكلم مع واحده صاحبتي طبيبه بالصدفه وباقولها اللبن قليل
المهم قالتلي اوعي تقولي كده لان اللبن مرتبط بالنفسيه لما تحسيه قليل هيبقى قليل ولما تحسيه مكفيهم هيكفيهم ان شاء الله
وفعلا الكلام اقنعني وابتديت مفكرش اللبن هيكفي ولا لا
وبدات ازيد من اكلي والسوائل والحلويات لاني كنت باحس بحاجه للسكريات ومهتمتش بالناس اللي بتنصح بقلة الاكل او تجنب الحلويات علشان وزنك ميزيدش
ودي اول خطوه اني سبتني من كلام الناس وركزت على الاكل والشرب اللي بيجيب لبن الحلاوة الطحينيه والحلبه واخدت هيربانا مرتين في اليوم والتزمت بالتلات وجبات في اليوم
ودايما الخيار الاول هو الطبيعي ولو حسيتهم جعانين اكمل بالصناعي لان الرضاعه بتجيب رضاعه
وبدات اعالج الحلمات من التشققات باستخدام كريم اسمه ميبو والبانثينول لحد ماراحت التشققات الحمد لله بقيت ادهن الحلمات يوميا بزيت الزيتون كوقايه
واضع بعد كل رضعه قطرتين من الحليب على الحلمه واتركه يجف عليه والحمد لله الامور اتحسنت والحمد لله بدا وزنهم يزيد شويه فبدات احس بالامان
وبعدها بدات اوقف الرضعات الصناعي بالليل وبقيت ارضع بالليل طبيعي وعند الطلب مبقيتش مرتبطه بالمواعيد زي الاول
وبقيت ادي رضعة اعشاب اثناء الليل عند اول طلب للرضاعه بعد رضعة قبل النوم علشان اطول الفتره اللي بانامها وعلشان اظبط نومهم ويعرفوا ان بالليل مفيش رضاعه حليب لان ده وقت النوم بس ده محصلش غير لما كملوا الشهرين طبعا في الاول لازم يرضعوا كويس ووقت ما يحبوا
و بقيت اثبت لكل واحده منهم ناحيه طول اليوم واليوم التاني ابدل وهكذا حتى احافظ على كمية اللبن في الناحيتين متساويه وميكونش في ناحيه اقل من التانيه لاني كما ذكرت عندي واحده منهم مش بتعرف ترضع كويس زي اختها وبكده اكون ضمنت اني عدلت بينهم في تقسيم اللبن الطبيعي بينهم لان دي كانت من النقط اللي قالقاني جدا جدا
والحمد لله مازلت مستمره على هذا النظام وقدرت اخفض عدد الرضعات الصناعيه في اليوم الى رضعه واحده يوميا باخليها غالبا قبل النوم علشان يناموا نوم عميق او لما اكون خارج البيت وصعب اني اجد مكان ارضعهم فيه
وده خلال شهر تقريبا زي الاخت القناصه الورديه
بطلت اخد الهيربانا (كبسولات الرضاعه)
وهما دلوقتي مكملوش التلات شهور
والله الموفق ادعولي اقدر اكمل رضاعتهم لحد ما يكملوا السنتين
هاجملكم تجربتي في نقط علشان ممكن يكون كلامي مش مرتب قوي
1-الثقه في الله انه هيعينك ترضعي طبيعي وان الرزق مكفول لكل العباد مابالك بهذا الرضيع الذي لا حول له ولا قوة
2-عدم الاهتمام بكلام الناس المحبط والتاكد ان كل تجربه تختلف عن الاخرى
3-ثقفي نفسك من قبل الولاده عن الرضاعه وتعلمي كيف ترضعين وكيف تساعدي طفلك على الرضاعه (مواضيع د. شروق مفيده جدا جدا)
4- الوقايه من تشقق الحلمات (انا استخدمت زيت الزيتون وقطرتين حليب بعد كل رضعه )
5-استخدام الشفاط كل 3 ساعات عندما تكون الحلمه مجروحه او ملتهبه
6-الاكل المتوازن والالتزام ب3 وجبات يوميا وشرب السوائل كثيرا و خصوصا مدرات الحليب زي الحلبه والينسون
7-الرضاعه الليليه
8-عدم الالتزام بمواعيد عموما وخصوصا اثناء الليل (ودي اكتر حاجه فرقت معايا)
9-تشفيط اللبن كل ما يتجمع (اذا كان الطفل نائم او مش عايز يرضع )
10-النوم العميق ولو تلات او اربع ساعات في اليوم (هو صعب طبعا بس ممكن انا باستخدم رضعة الاعشاب علشان ماصحاش ارضعهم والنوم يطير من عيني)
11- خلي خيارك الاول دائما الطبيعي لان الرضاعه بتجيب رضاعه ولا تلجأي للرضعه الصناعي طول ما عندك حليب يعني الصناعي لو احتجتيه قوي خليه رضعه مكمله ومتبتديش بيه
نقلت لكم هذه التجربه للاستفاده